فد يوم (حجي نؤيل) ديباوع بخريطة العالم جان يشوف العراق !
كال: إييييي.. هذولة خطيـّة خلي أروحلهم .. المهم.. نكر سِلْف للعربانة مالته وانطاها اللهيب كبل للعراق وبغداد خصوصاً.. بقى تقريبا ثلاث ساعات يدوّر على بيت بي شجرة مال إكرسمس وماكو.. هناك و يخيّطها بِبريك قوي، نِزل بالسطح يدوّر على فتحة مال مدخنة يفوت منها .. ماكو.. باب مفتوحة.. ماكو.. شباك يكسره ويفوت منة .. هم ماكو لأن كلهة بيهة كتايب.
المهم.. فات من الفتحة مال المبردة وحطْ الهدايا يم الشجرة وطِلع.. أول ما طِلع سمع صوت واحد يصيّح (حرامي!!!).. وعينكم ما إتشوف الاّ النور.. إشتغلتْ الطلقاتْ والبيكيسياتْ وحتى قاذفات وهاونات..كلها على هالرجّال المسكين.. وظل يركض مِن بيت لبيت، ومِن سطح لسطح، ما يعرف شنو الفلم ؟
والتمّت المونيكات والهمرات والحرس الوطني والشرطة... واحد يكول شفتة لابس حزام ناسف .. واللاخ ايكول العربانة مالته مفخخة .ما طولها عليكم كُمشه واحد وسحله من لحيتة للمركز بعد ما شبع كتل بالطريق.. وبالتحقيق محد صدك انو بابا نؤيل وبعدين زينوه صفر وأخذو موبايله و أربع أوراق ونص بجيبة هم أخذوهِن.. تالـــــي كالوا رجال جبير وطلعوا !
رجع (بابا نويل) للبيت الي نِزل بالسطح مالتة لكة العربانة ماكو.. سِئل جاهل شصار بالعربانة؟؟... كاله: الغراض إلي بيهة إتحوسمتْ و الغزلان والعربانة إجو أخذوهن الدوّارة أهل الطحين وراحوا.
ويدكهة الرجّال مشي من بغداد لبيتهم حتى فلوس كيا بجيبه ماكو .
المهم وهو بطريق الرجعة وما يعرف شيسوي طكت يمة مفخخة ،
كمّل مشي الرجّال وبالصدفة.. وهو بطريق الرجعة كمشُوه جماعة.. وأخذوه.. وهمْ عذبوه وكالوله: إنته منين؟؟ سني لو شيعي؟؟.. كالهم يابا آني (بابا نؤيل).. كللوله: حضرتك لوتي !!!.. وجوي ديذبحوه، ويةَ مديذبحوه جتي الغزلان والعربانة... طلعوا فالتين من بغداد وبالكوة جلب بيهن وفلت.. المهم هوة عبالة إرتاح و بعده ما منَجِّم بالسِما، جان يجيه (سِترِلّه) من هذا الحنَيّن ويضرب العربانة وإشتغلت السبعة وخمسين علية ودوشكات... المهم هوة مدري شلون إنشمر فوك غزالة من غزلانه وفِلتْ وراح لبيتهم بالقُطب وقدّم استقالة من هاي الشغله.. وهسة كلّش يكره الجهال وما يحب الهدايا وبس يباوع أفلام رعب يصيح....
ويــــن يـــروح المطلــوب إلنــــة !
موضوع: بابا نؤيل في بغداد 
الجمعة مارس 14, 2008 3:55 pm
